週二, 13 三月 2018 10:08

拍片無限耆 77歲攝影師兼剪片 幫長者拍片錄遺囑

Written by

【蘋果日報】「我禮拜日去殯儀館喇又要去。」對於77歲的大雄哥而言,人到了白髮鬍疏的年紀,送別朋友竟不知不覺變成一件尋常事,說起來也不痛不癢。18年前,他離開運輸大哥的身分,由用電腦滑鼠學起,逐步進化成今日的攝影師,義務為長者中心的老友記拍攝「預前遺囑」,透過鏡頭走進別人的內心世界,更讓他賺得尊敬與滿足感。在攝影的天空下,大雄哥懷著一顆赤子之心,每次與志同道合拍攝,都是值得期待的旅程。


記者:陳麗賢 攝影:周智堅、陳麗賢 剪接:魏利民

60歲退休:「再唔去玩呢就冇機會喇」

吳國雄雖然在長者中心被尊稱為「大雄哥」,但一談起往事,瞬間回到十八少年。當年他性格主動又貪玩,學完英語就去做調酒師,之後又做過消防員,生活多姿多彩,活像「沒有腳的雀仔」。不過,隨著年歲漸長,雀仔也渴望落地,他想發展穩定事業,養活太太與三個子女,於是加入運輸業,既做司機又負責車隊管理,「當時我哋搏命,啲細路哥仲好細個,只係讀小學,佢哋都唔知咩事。只有我番到屋企,知道太太照顧好佢哋。」


40年匆忙過去,直到一天,大雄哥決定退下火線:「因為發覺嗰時我已經60幾歲喇。人生裡面好苦短,我認為如果自己有精神,仲可以行得走得,應該上半生辛苦,留番下半生嚟享受吓啦。」說著,他忽然想起星期日要去朋友的葬禮:「我朋友好有錢㗎,佢游游吓水突然沉咗落水底,咁就搞掂咗。所以人生係好無常㗎,如果我哋再唔去玩,年紀太大身體有問題,你有多多錢都冇用。」


變身攝影師 一切由電腦開始

大雄哥試過被女兒潑冷水,「佢成日叫我唔好掂部電腦,因為會搞到啲嘢唔見晒。」結果反而激勵了他加入長者中心,由「如何使用滑鼠」開始學起。完成電腦班後,長者中心又邀請他加入攝影班,於是試著上堂,結果一試便發展成終生愛好。


「講得好聽啲,謙虛啲就係想自己識多啲嘢。講得唔好聽,就係好勝。學學吓,我同朋友都覺得有興趣,於是買埋器材一齊帶過去。我哋初初學剪片,就用老人中心最簡單嘅軟件『會聲會影』,之後希望自己能夠upgrade自己,就走去學Adobe Premiere。」


不過,長者接觸新科技又談容易,「講到老人家學拍攝呢,我好多心得,點解呢?我碰過好多壁。」他發現無論攝影技巧及後期製作連「半桶水」都談不上,「靠撞下撞下咁撞番嚟,好多嘢都搞唔掂㗎。」直到2014年見到采風電影開辦「兩代合拍」退休人士紀錄片製作班,由年輕紀錄片工作者擔任導師,教授基本拍攝及製作技巧專業,前期及後期課程共16堂。大雄哥不但學到夢寐以求的實戰技巧,更有意外收獲:「識到班兄弟,有班老友記。咁啱明愛(長者中心)又想話搵個攝製組,大家不謀而合。」之後,「明愛第三齡服務支援網絡攝製組」正式組成,最初只有大雄哥和另一位成員,義務包辦拍攝及剪接長者活動,至今已發展成9位兄弟班,全部均是退休人士。


幫長者錄遺囑 走進他人內心世界

沒想到,藉著義工服務,他有機會拍攝難能可貴的畫面:「我哋要幫手錄預前遺囑,意思話長者講定啲嘢,財物點分法、點樣照顧等,唔喺度(過身)先畀屋企睇。佢哋講咗好多自己身世出嚟,呢樣對我影響最大。」受訪者的故事彷如人生一面倒影,讓他反思:「而家我哋影佢,將來我哋條路一定咁行,我都會咁行。咁係咪將來有啲義工,都可以服務番我哋呢?呢個想法對我做義工嘅信念都加強咗。」


77歲的赤子之心 期待拍片永遠無限「耆」

現時,義工攝製隊每星期起碼有一次聚會,大家齊齊帶電腦到中心重溫攝影作品,討論改善之處:「我地經常遇到有問題㗎,我哋剪片都係。我哋想辦法去解決,解決到好高興㗎。即係發覺自己仲係有用嘅,哈哈。」見到攝製隊慢慢茁壯成長,大雄哥興奮地說:「我發覺搵到啲好有能力,大家志同道合一齊喺度互相研究、互相學習,呢個就係一個最好嘅經歷。」每當有拍攝機會,他們都會嚴陣以待,彷彿忘記了年齡的限制:「我希望自己能夠喺身體好嘅情況下,繼續喺呢個志同道合班兄弟裡面,繼續可以做落去,就咁係最好做法喇。」

(蘋果日報) 2018年02月24日

Read 746 times

Media